Эрдэс баялаг эрчим хүчний яамны харьяа Ашигт малтмалын газраас Уул уурхайн салбарын 88 жилийн ойн арга хэмжээний хүрээнд уул уурхайн салбарт үйл ажиллагаа явуулж буй шилдэг компаниудыг тодруулж, шагнал гардууллаа. Энэхүү шалгаруулалтын гол зорилго нь дотоодын болон олон улсын стандартад бүрэн нийцсэн, бүтээмж өндөртэй үйлдвэрлэл явуулж буй уул уурхайн компаниудын үйл ажиллагааг дэмжих, ашигт малтмалын ордуудыг эдийн засгийн эргэлтэнд оруулахад шаардагдах хөрөнгө оруулалтыг шийдэж буй үйл ажиллагааг урамшуулахад оршиж байгаа юм байна.

Нийт 5 номинацид шалгаруулалт явуулснаас Уул уурхайн салбарын тэргүүний хөрөнгө оруулагч, Шилдэг технологи нэвтрүүлэгч номинациудад үндэсний уул уурхайн компани Энержи Ресурс ХХК шалгарч, өргөмжлөл хүртсэн бол Хөдөлмөрийн аюулгүй байдлын номинацид Бэрэн групп, Шилдэг нөхөн сэргээлт номинацид Монполимет компани тус тус тэргүүлжээ.

Монгол улсад уул уурхайн салбар дэлхийн жишиг стандартын дагуу хөгжин эрчимжиж, үндэсний компаниуд олон улсад өрсөлдөх чадвартай болсны тод жишээг өнгөрөгч 10-р сард Хонконгийн хөрөнгийн биржид хувьцаагаа гаргасан Энержи Ресурс компанийн амжилтаас харж болохоор байгаа. Түүнчлэн энэ жишгээр цаашид дотоодын олон компани олон улсын зах зээлээс хөрөнгө босгож, үйл ажиллагаагаа өргөжүүлэх боломж нээгдэнэ гэдэгт итгэж байгаагаа ч мэргэжлийн хүмүүс хэлж байсан. Мөн уг арга хэмжээний үеэр салбарын шилдэг уурхайчин болон шилдэг геологичдыг шалгаруулсан байна.