Ухаа худаг нь Монголоос анх удаа ISO стандартуудаар Олон улсын менежментийн нэгдсэн тогтолцоог цогцоор нь нэвтрүүлсэн уурхай билээ. Энэ хүрээнд бид Чанарын менежментийн тогтолцоо ISO 9001:2015, Байгаль орчны менежментийн тогтолцоо ISO 14001:2015, Хөдөлмөрийн эрүүл мэнд, аюулгүй байдлын менежментийн тогтолцоо OHSAS 18001:2007 гэсэн олон улсын гурван төрлийн стандартыг нэвтрүүлэн ажиллаж байна.

Стандартуудын хэрэгжилтийг тогтмол хянаж, магадлаж явах шаардлагатай байдаг. Өнгөрсөн долоо хоногт уг тогтолцооны хэрэгжилтийг хянах магадлангийн хоёр дахь шатны аудитийг Монсертф ХХК-ийн аудиторууд хийж дууслаа. Уул уурхайн салбарт олон улсын ISO стандартууд цогцоор нэвтэрснээр үйлдвэрлэлийн бүтээмж, чанар сайжрах бөгөөд хариуцлагатай уул уурхай төлөвших гол ач холбогдолтой юм.

Энержи Ресурс компанийн ХАБ-ын менежер Б.Үүрийнтуяа:

Хоёр жил тутам энэ аудит хийгддэг. Энэ удаа аудиторууд биднийг өмнөх сайжруулах саналуудыг маш сайн хэрэгжүүлсэн байна. Мөн санаачлагаараа олон зүйл хийсэн байна гэж дүгнэлээ. Бид цаашдаа Хөдөлмөрийн эрүүл мэнд, аюулгүй байдлын OHSAS 18001:2007 стандартаа ISO45001:2018 болгох мөн менежментийн нэгдсэн тогтолцоог төслийн бусад үйл ажиллагаандаа нэвтрүүлэх зорилготой байна.