Энержи Ресурс компани болон Өмнөговь аймгийн Цогтцэций сумын дунд сургуулийн хамтын ажиллагааны хүрээнд тус сургуулийн сургалтын чанарыг нэмэгдүүлэх, хичээлийн хөтөлбөрийг эрчимжүүлэх зорилгоор Англи хэлний багш Д. Насандооёо, Математикийн багш Д. Оюунтуяа нар Цогтцэций суманд уригдан ирж багшилж байгаа билээ. Сүүлийн үед Цогтцэций сумын сургуулийн багш сурагчдын сургалтын чанарт мэдэгдэхүйц ахиц гарч улсын чанартай олимпиад болон уралдаан тэмцээнүүдэд өндөр амжилт үзүүлэх болсон байна.

Тухайлбал Өмнөговь аймгийн төрөл мэргэжлийн олимпиадад (улсын олимпиадын 2-р даваа) Цогтцэций сумын сургууль багаараа алтан медаль хүртсэн амжилтаар сумынхаа нэрийг өндөрт өргөсөн бол өнгөрөгч сард УИХ-ын гишүүн Баярсайханы нэрэмжит гадаад хэлний баярт оролцож мөн гялалзсан амжилт гаргасан байна. Англи хэлний төрөлд 8-р ангийн нийт 200-аад сурагчоролцсоноос Цогтцэций сумын Англи хэлний гүнзгийрүүлсэн сургалттай 12 жилийн ЕБС-ийн 8в ангийн сурагч С.Отгонбаяр 1-р байр эзэлж алтан медаль, 5а ангийн Тэмүүжин 2-р байр эзэлж мөнгөн медаль, мөн 8в ангийн сурагч Г.Гандиймаа 8-р байр, 7 ангийн сурагч А.Урангоо насны ангилалдаа мөн 8-р байр эзэлж тус тус шагнагдлаа. Цогтцэций сумын Англи хэлний гүнзгийрүүлсэн сургалттай 12 жилийн ЕБС нь Англи хэлний сургалт, арга зүй, сургалтын хэрэглэгдэхүүний төрөлд Бүтээлч хамт олон, ерөнхий дүнгээр тус баярын үйл ажиллагаанд хамгийн идэвхитэй оролцогч хамт олноор тус тус шалгарсан байна. Энэхүү амжилт нь Энержи ресурс компанийн явуулж буй орон нутгийн боловсролыг дэмжих бодлого болон сургуулийн нийт хамт олны уйгагүй хүчин чармайлтын үр дүн болох талаар сургуулийн удирдлага болон багш нар онцолж байлаа.