Ухаа худаг дахь Монголын анхны нүүрс баяжуулах үйлдвэр ашиглалтад орсны 10 жилийн ой энэ онд тохиож байна. Уг үйлдвэр ашиглалтад орсноор Монголчууд нүүрсээ түүхийгээр биш дотооддоо угааж баяжуулан, нэмүү өртөг шингээсэн эцсийн бүтээгдэхүүн үйлдвэрлэж, экспортлож эхэлсэн юм. Нийт 3 модультай, жилдээ 15 сая тн нүүрс баяжуулах хүчин чадалтай, бүрэн автомат үйлдвэрийг 2011 оноос эхлэн үе шаттайгаар ашиглалтад оруулсан. Салбартаа тэргүүлэгч Австрали улсын нүүрс баяжуулалтын технологи, дизайны шийдлүүдийг уг үйлдвэрт нэвтрүүлсэн.

Ашиглалтад орсноосоо хойш 10 жилийн хугацаанд нийт 69.5 сая тонн түүхий нүүрс баяжуулж, 34.6 сая тонн баяжуулсан коксжих нүүрс, 13 сая тонн баяжуулсан эрчим хүчний нүүрс гарган авчээ. Түүнчлэн, нүүрс баяжуулах үйлдвэрийн дэргэд Хаягдлыг усгүйжүүлэх үйлдвэрийг тусгайлан байгуулж, үйлдвэрээс гарч байгаа нүүрсний лаг хаягдлаас усыг шавхсанаар усны дахин ашиглалтыг 95 орчим хувьд хүргэсэн байна.

Нүүрс баяжуулах үйлдвэрийн ойн хүрээнд Монгол Улсын нүүрс баяжуулах технологийн хөгжлийн өнөөгийн байдал, цаашдын чиг хандлагыг эрдэмтэн судлаачид, инженерүүдийн судалгааны ажлын үр дүн, үзэл баримтлалд тулгуурлан дүгнэх, нүүрс баяжуулах үйлдвэрийн ололт амжилт, технологийн дэвшлийн талаар  туршлага солилцох зорилгоор “Нүүрс баяжуулалт 2021” онол практикийн бага хурлыг  Монголын ашигт малтмал баяжуулагчдын холбоотой хамтран цахимаар амжилттай зохион байгууллаа.