Төр, хувийн хэвшлийн түншлэлийн хүрээнд нүүрсний экспортыг эрчимжүүлэх, хилийн боомтуудын нэвтрүүлэх чадварыг нэмэгдүүлэх зорилгоор хилийн боомт, улсын хилийн бүс, зурвас газруудад чингэлэгт тээврийн терминалыг байгуулах Засгийн газрын 185-р тогтоол энэ оны долдугаар сард батлагдсан.

Энэ дагуу нүүрсний экспортын гол суваг Гашуунсухайт боомтод чингэлэгт тээврийн нэмэлт терминал байгуулах төслийн гүйцэтгэгчээр манай компани төртэй хамтран ажиллаж, нийт 30 га талбайд терминал байгуулах ажлыг хоёр сарын хугацаанд дуусгаж, улсын комисст хүлээлгэн өглөө.  Уг терминалыг барьж байгуулахтай холбоотой санхүүжилтийг манай компани “Эрдэнэс Таван Толгой” ХК, "Тавантолгой” ХК компаниудтай хамтран хариуцсан.

Монгол Улсын Ерөнхий сайд Л.Оюун-Эрдэнэ салбарын сайдуудын хамт Өмнөговь аймагт ажиллаж, төслийн явцтай танилцах үеэр “Цар тахлын нөлөөгөөр нүүрсний экспорт саарсан. Экспортыг нэмэгдүүлэх олон цогц ажил хийж байна. Үүний нэг болох Гашуунсухайт боомтын терминал барих ажлыг төртэйгээ хамтран богино хугацаанд чанартай хийж гүйцэтгэсэн Энержи Ресурсын хамт олонд баярлалаа” хэмээн манай хамт олонд талархлаа илэрхийлсэн юм.

Чингэлэгт тээврийн терминал байгуулагдсанаар боомтын үйл ажиллагаанд оролцох хүн хоорондын шууд харилцаа багасч, нүүрсний тээвэрлэлтийн үйл ажиллагаанаас үүдэлтэй байгаль орчинд учирч буй сөрөг нөлөөлөл буурахын зэрэгцээ нүүрсний экспортын хэмжээ нэмэгдэх зэрэг олон ач холбогдолтой.