Монгол Улсын Засгийн газар болон МҮХАҮТ хамтран жил бүр уламжлал болгон тодруулдаг Монгол Улсын ТОП-100 ААН-ийг шалгаруулах үйл ажиллагаа цар тахалтай холбоотой хоёр дахь жилдээ цахимаар амжилттай зохион байгуулагдлаа.

Бизнесийн байгууллагуудын улсдаа оруулсан бодит хувь нэмрийг үнэлж, дүгнэдэг энэхүү шалгаруулалтад үндэсний уул уурхайн Энержи Ресурс  компани Монгол Улсын нийгэм, эдийн засагт хамгийн өндөр хувь нэмэр оруулсан ТОП-100 аж ахуйн нэгж шалгаруулалтын эхний 5-д дахин бичигдлээ. Үүнд, 2020 оны борлуулалт, татвар төлөлт, нийгмийн даатгалд хамруулсан ажиллагсдын тоо зэрэг гол үзүүлэлтүүдээр ТОП 5-д жагссанаар, ийнхүү хувийн хэвшлийн тэргүүлэгч аж ахуйн нэгжийн байр сууриа хадгалсан байна.  Тус компани 2010 оноос хойш ТОП-100 ААН-д нийт 8 удаа шалгарснаас тогтмол эхний тавд эрэмбэлэгдэж байжээ.

Энержи Ресурс компани өнгөрсөн онд, нийт 355 сая ам.долларын борлуулалт хийж, 180  орчим тэрбум төгрөгийн татвар хураамжийг улсад төлснөөс гадна 2,094 ажилтныг ажлын байраар хангасан байна.  Мөн нийгмийн хариуцлагын шинж чанартай төсөл, хөтөлбөрүүдэд нийт 10 гаруй тэрбум төгрөгийн хөрөнгө оруулалт хийжээ.