Монгол Улсын Ерөнхийлөгчийн санаачилсан “Тэрбум мод” үндэсний хөдөлгөөнд нэгдэхээ илэрхийлсэн аж ахуйн нэгжүүд Батламжид гарын үсэг зурах ёслолын арга хэмжээ Төрийн ордонд боллоо.  Уг ёслолд оролцсон үндэсний томоохон 21 аж ахуйн нэгж “Тэрбум мод” үндэсний хөдөлгөөнийг дэмжин нийт 608,500,000 модыг 2030 он хүртэлх хугацаанд тарьж ургуулж, арчлан хамгаалахаа баталгаажуулсан юм.

Энержи Ресурс компанийн хувьд 2030 он гэхэд Өмнөговь аймагт нийт 40 сая мод тарихаар төлөвлөснөө баталгаажуулан гарын үсэг зурлаа.

Эх орныхоо эдийн засгийг тасралтгүй тэтгэсээр ирсэн уул уурхайн салбар нь нөхөн сэргээлт хийх, байгаль орчноо хамгаалах замаар хамгийн олон мод ургуулдаг салбар. Компани үүсэн байгуулагдсан өдрөөс эхлэн бид говь нутагт мод тарьж, ургуулж эхэлсэн бөгөөд өнөөдөр нийт 52 га талбайд 30 гаруй төрлийн 150 мянган модыг амьдралтын 85 хувьтайгаар арчилж ургуулсан нь уурхайчдын маань 10 гаруй жилийн уйгагүй хөдөлмөр, зүтгэлийн үр дүн юм.

Байгаль орчин, аялал жуулчлалын яамны зүгээс “Тэрбум мод” үндэсний хөдөлгөөнд нэгдсэн аж ахуйн нэгжүүдэд мод тарьж ургуулах арга, аргачлал, технологийн нэгдсэн зөвлөмжөөр хангаж, хамтран ажиллахаа илэрхийллээ.