Энержи Ресурс компани Соёлын өвийг дэмжих хөтөлбөрийнхөө хүрээнд 8-р сарын 4-5-ны өдрүүдэд Өмнөговь аймгийн Цогтцэций суманд “Ухаа худаг 2023” баяр наадмыг 10 дахь жилдээ зохион байгууллаа. Наадамд 128 хүчит бөх, өсвөрийн 32 бөх, Энержи Ресурс компанийн ажиллагсдын төлөөлөл 64 бөх, Өвөрмонгол барилдаанд 8 бөх тус тус хүч үзэн барилдсанаас үндсэн барилдаанд Баянхонгор аймгийн Жинст сумын харъяат, MCS группын бөх, Улсын начин Э.Батмагнай түрүүлж Өвөрхангай аймгийн Хархорин сумын харъяат Улсын начин Б.Сугаржаргал үзүүрлэлээ. Ажиллагсдын барилдаанд Энержи Ресурс компанийн Дэд бүтцийн албаны бөх, сумын заан Э.Мөнхбаатар түрүүлж, Автын хэсгийн бөх Б.Батболд үзүүрлэлээ. Өвөрмонгол барилдаанд “Паблик сервис” ХХК-ийн бөх, сумын заан А.Ихтэнгэр түрүүлж, уурхайн залуу бөх Г.Пүрэвсүрэн үзүүрлэсэн бол өсвөрийн барилдаанд Сумын заан О.Сумьяабазар түрүүлж, Аймгийн шонхор Э.Лхагвасүрэн үзүүрлэж, наадамчин олноо баясгалаа.
Хурдан морины уралдаанд 7 аймаг, 26 сумын, 5 насны нийт 170 шандаст хурдан хүлэг уралдсанаас их насанд Өмнөговь аймгийн Цогтцэций сумын уяач Б.Тогтохын хээр, соёолон насанд Өмнөговь аймгийн Номгон сумын уяач Б.Содномцэрэнгийн бор, хязаалан насанд Өмнөговь аймгийн Цогтцэций сумын уяач Ө.Очирсумын хээр, шүдлэн насанд Өмнөговь аймгийн Цогтцэций сумын уяач Б.Баярмагнайн зээрд халзан, дааган насанд Дундговь аймгийн Өлзийт сумын уяач Э.Жамъянсүрэнгийн бор халзан даага тус тус түрүүлж уясан эзэн, унасан хүүхдээ баярлуулсан юм. Үндэсний сурын харваанд улс, аймгийн цолтой, чансаа өндөр 113 мэргэн харваач, өсвөрийн 54 харваач оролцсоноос эрэгтэйчүүдийн насанд хүрэгчдийн төрөлд Өмнөговь аймгийн мэргэн, спортын мастер Д.Чулуунбаяр, эмэгтэйчүүдийн насанд хүрэгчдийн төрөлд Өмнөговь аймгийн мэргэн, спортын мастер Б.Бямбаа, өсвөрийн эрэгтэй харваачдаас А.Алтан-Эрдэнэ, эмэгтэй харваачдаас А.Номин-Эрдэнэ нар түрүүллээ.
Шагайн харваанд улс, аймаг, сумын цолтой 35 багийн 280 харваач цэц мэргэнээ сорин өрсөлдсөнөөс багийн харвааны төрөлд аймгийн Гоц мэргэн Б.Өлзийхүү ахлагчтай Өмнөговь аймгийн Ханхонгор сумын баг, нумт харваа төрөлд Б.Ганбат ахлагчтай Улаанбаатар хотын баг түрүүлж, наадамчин олноо баясгасан юм.Мөн “Ухаа худаг 2023” баяр наадмын үеэр циркийн тоглолт, хүүхдийн дууны уралдаан, үдшийн шоу цэнгээн, амьд хөгжлийн тоглолтууд зохиогдож, нийт 100 гаруй уран бүтээлч хамрагдлаа.